خنت عهدي دام بعت اللي شراك =يوم ترخص فـ المحبة مشتريك
يوم تبدي لواحد ٍ غيري غلاك =وفـ المحبة يالغضي ما أقبل شريك
روح يم اللي تحسب إنه فداك=خله بقلبه وعينه يفتديك
وبكره اليا من محبوبك جفاك =لاتجي تبكي وتمد النا يديك
منت مغصوب ٍ على اللي ما بغاك=وفـ الهوى مانيب مغصوب ٍ عليك
غرني برق ٍ تكاشف في سماك=ورّد الضامي على العد الهليك
وغرني معسول ماتنطق شفاك=ولا حصل وصلك ولانيب مرتويك
وا حسايف وقتي الضايع معاك=وا حسايف لهفتي يوم احتريك
مير يالغدار رح عني وراك=والله اني عقب غدرك ما أبيك
الله انه لا يعيد النا هواك=ولا يجي يوم بحياتي والتقيك