من ٥ ساعات الأخ والأخت بلعبوا مع بعض، وفجأة ناموا، ناموا جنب بعض..
و بعد ٢٠ سنة بتيجي وحدة بتحكيله "أختك ما بتحبلنا الخير"
إنتِ عارفة شو صار بالعشرين سنة؟
عارفة كم مرة استنجدت فيه ليقتلها صرصور!
طيب بتعرفي كم مرة روح من المدرسة وهو شارليها بنص مصروفه!
فكرك كم مرة.. مرضوا سوا .. عداها.. وعدته ...
إنتِ متخيلة كمية الضحكات اللي ضحكوها سوا!
مئات المرات اللي تعاقبوا سوا..
أول رحلة بالسيارة.. وأول مشكلة مين يقعد عالشباك..
كم مرة شربوا بنفس العصير ..
وكم مرة ساعدوا بعض بالدراسة .. وكم مرة كذب عشان ما تتعاقب اخته .. وكم مرة وشوشوا بعض عشان ما نسمع ..
إنتِ عارفة .. بالملاهي لما ضاع ساعة ..
أخته ضلت تعيط عليه خمس ساعات ...
وإنتِ عارفة .. كم سندويشة لبنة وسنيورة عملتله ...
وعارفة كم مرة بعتته يجيبلها شوكولاته ..
بالصيف .. بالشتا .. بعز البرد .. بعز الشوب .. بالنهار .. بالليل ... مليون مرة ..
وإنتِ عارفة بس نجح بالتوجيهي .. فرحت عالفيس وعالانستغرام والسناب أكتر منه .. صورته .. وحضنته .. وصورت الكنافة ...
إنتِ عارفة .. لما اجوا شافوكِ أول مرة .. روحت طيران لتوصفك إله .. وإنتِ عارفه كم محل دخلت لتشتري الفستان اللي بدها تحضر فيه عرسه ... مش عشان هي مأنفة ..
لأ .. هي أكتر حدا فرحان بالعالم ..
هاد اللي كان نايم جنبها وهو صغير .. كبر و تزوج وراح يفتح بيت... ونشوف ولاده ..
عشرين سنة .. فيهم عشرين ألف موقف ...
و ما بتحب الخير إله؟
أخوك.. أختك .. رحمة من ربنا رح يضلوا جنبك طول العمر وبعد حياتك .. ولا عمره بهونلهم فيك ..
تابعونا هنا 
زائر 
الثلاثاء 19 نوفمبر - 11:39 من طرف 
عدد المساهمات
تاريخ التسجيل
موضوع: ستعجبكم 
