حرامى الرغيف
تسرق رغيف يا حرامى وتتحبس شهرين ؟!
لو كنت قاضى المدينة لأحبسك سنتين
لأن ذنبك يا مجرم يعتبر ذنبين
المهنة رخصتها لما سرقت رغيف
وسرقت من قبل ما تصبح وجيه وشريف
لا إنت حرامى تشرفنا ولا إنت وجيه
ويا ويله ، ما أتعسه الواقف ما بين بينين !
تهجم على السرقة ليه يا أجهل الجهال
رئيس قلم حضرتك ؟ ولا مدير أعمال !
السرقة يا ابن الحلال صنعة وعايزة رجال
لهم فى فض المشاكل والأمور تصريف
ومن وراهم ضهور جامدة وجنس لطيف
يهونوا إللى جرى ويلطفوا تلطيف
وفين تروح بالرغيف جنب الأكابر فين !
إصبر على نعمتك يمكن حتبقى وجيه
وجيه بمكتب وساعى بالجرس تناديه
وسكرتير زى حالى لما تشخط فيه
تتزلزل الأرض والعالم يقول يا لطيف
والبنكنوت يتحشى لك حشو فى مظاريف
تلقاها بالصدفة فى جيبك بدون تكليف
وتقول عجيبة يا رب الظرف جانى منين !!