الابنودي .... وقصيدة الميدان
عبد الرحمن الابنودي .....
عبد الرحمن الأبنودي شاعر مصري يعدّ من أشهر شعراء العامية في مصر.
قصيدة .... الميدان
ايادي مصرية سمرا ليها في التمييز
ممدودة وسط الزئير بتكسر البراويز
ف طوع لصوت الجموع
شوف مصر تحت الشمس
آن الاوان ترحلي يا دولة العواجيز
عواجيز شداد مسعورين اكلوا بلادنا اكل
و يشبهوا بعضهم نهم و خسة و شكل
طلع الشباب البديع
قلبوا خريفها ربيع
و حققوا المعجزة
صحوا القتيل م القتل
اقتلني..
قتلي ما حيعيد دولتك تاني
بكتب بدمي حياة تانية لاوطاني
دمي دا و للا الربيع؟؟
الاتنين بلون اخضر
و ببتسم من سعادتي و للا احزاني
تحاولوا ..
ما تحاولوا ..
ماتشوفوا وطن غيره
سلبتوا دم الوطن و بشمتوا من خيره
احلامنا .. بكرانا .. اصغر ضحكة علي شفة
شوفتوشي صياد يا خلق بيقتلوا طيره؟؟
سوس بينخر و سارح تحت اشرافك
فرحان بهم كنت .. و شايلهم علي كتافك
و اما اهالينا..
من زرعوا و بنوا و صنعوا
كانوا مداس ليك و لولادك و احلافك
و يا مصر ..
يا مصر قام العليل .. رجعتلوا انفاسه
و باس جبين الوطن .. مال الوطن باسو
من قبل موته بيوم ..صحوه اولاده
من كان سبب علته .. محبته لناسه
الثورة..
فيضان قدييييم محبوووس
ما شافوش دوول
الثورة لو جت متبانش في كلام او قول
تقلب و تعدل في سرية
تفور في القلب
و تنغزل فتلة فتلة في ضمير النول
متخافش علي مصر يابا
مصر محروسة
حتي من التهمة دي اللي فينا مدسوسة
و لو انت ابوها بصحيح و خايف عليها اوي
تركتها ليه بدن .. بتنخره السوسة ؟؟؟؟؟
و بيسرقوك يا الوطن .. قدامنا
عيني عينك
ينده بقوة الوطن و يقولي قووووووووم
فينك؟؟؟؟؟؟
ضحكت علينا الكتب بعدت بنا عنك
دولا ولادنا اللي قاموا يسددوا دينك
لكن خلاص يا وطن
صحيت جموع الخلق
قبضوا علي الشمس بأديهم و قالوا لاء
من المستحيل يفرطوا عقد الوطن تاني
و الكدب تاني م المستحيل يلبس قناع الحق
بكل حب الحياة خوض في دم اخوك
قول انت مين؟؟
للي باعوا حلمنا .. باعوك .. اهانوك
و ذلوك .. و لعبوا قمار باحلامك
نيران هتافك تحرك ضحدك الممسوك
يرجعلها صوتها مصر
تعود ملامحها
تاخد مكانها القديم
و الكون يصالحها
عشرات سنين
تسكنوا بالكدب في عروقنا
و الدنيا متقدمة و مصر مطرحها
كتبتوا اول سطور في صفحة الثورة
و هما علما و خبرا مزاورة و مناورة
وقعتوا فرعون هرب من قلب تمثاله
لكن جيوشه ما زالوا يحلموا ببكره
صباح حقيقي
و درس جديد اوي في الرفض
اتاري للشمس صوت
و اتاري للارض نبض
تاني معاكم رجعنا نحب كلمة مصر
تاني معاكم رجعنا نحب ضحكة بعض
مين كان يقول ابننا يطلع بنا م النفق
دي صرخة و للا غنا ؟؟ و دا دم و للا شفق؟؟
اتاريها حاجة بسيطة الثورة يا اخواننا
مين اللي شافها كدا
مين اول من بدا
مش دول شبابنا اللي قالوا كرهوا اوطناهم
و لبسنا توب الحداد و بعدنا اوي عنهم
هما اللي قاموا انهاردة يشعلوا الثورة
و يصنفوا الخلق مين عانهم و مين خانهم
يادي الميدان اللي حضن الفكرة و سهرها
يادي الميدان اللي فتن الخلق و سحرها
يادي الميدان اللي غاب اسمه كتير عنو
و صبرها مابين عباد عاشقة و عباد كارهة
شباب كان الميدان اهله و عنوانه
و لا في الميدان نسكافيه و لا كابتشينو
خدوده عرفوا جمال النومة ع الاسفلت
و الموت عارفهم اوي و هما عارفينوا
لا الظلم هين يا ناس
و لا الشباب قاصر
مهما حاصرتوا الميدان عمره ما يتحاصر
فكرتني يا الميدان بزمان و سحر زمان
فكرتني باغلي ايام في زمن ناصر
شايل حياتك علي كفك
صغير السن .. ليل بعد يوم المعاناة و انت مش بتأن
جمل المحامل و انت غض
بتعجب امتي عرفت النضال
اسمحلي
حاجة تجن
اتاريك جميل يا وطن
مازلت و حتبقى
زال الضباب و انفجرت بأعلي صوت
لاءءءءءءءءءءا
حركتنا نبتسم و دفعت انت الحساب
و بنبتسم بس بسمة طالعة بمشقة
فينك يا صبح الكرامة
الا البشر هانوا و اهل مصر الاصيلة اتهانوا و اتخانوا
بنشتري العزة تاني
و الوطن غالي
فتح الوطن للجميع قلبه و احضانه
الثورة فيض الامل
و غنوة الثوار
الليل اذا خانوا لونه يتقلب للعار
ضج الضجيج بالندا
اصحى يا فجر الناس
فينك يا صوت الغلابة و ضحكة الانفار
و احنا وراهم اساتذة خايبة
نتعلم ازاي نحب الوطن و امتي نتكلم
طال الصدا قلبنا و يأسنا من فتحه
قلب الوطن قبلكم كان خاوي و مضلم
اولنا في الجولة
لسه جوله ورا جولة
دا سوس بينخر يا بويا في جسد دولة
ايوا الملك صار كتابة
انما لو غفلت عينا لحظة
حيقلبوا العملة
لكن خوفي مازال جوا الفؤاد يكبش
خوفي اللي ساكن شقوق القلب و معشش
يقولي مش راح يسيبوا و لسه حيقبوا
و حيلاقولهم سكك و بيبان ماتتردش
و حاسبوا اوي م الديابة اللي ف وسطيكم
و الا تبقي الخيانة منكم فيكم
الضحكة ع البوووء
بس الرك ع النيات
فيهم عدوين اشد من اللي حواليكم
تابعونا هنا 
زائر 
أمس في 11:35 من طرف 
عدد المساهمات
تاريخ التسجيل
موضوع: الابنودي .... وقصيدة الميدان 
